19.05.2015 | Мемлекет басшысының қатысуымен өтетін алдағы іс-шаралар аңдатпасы

http://www.akorda.kz Қазақстан Президенті 21 мамырда Литваның премьер-министрі Альгирдас Буткявичюсті, сондай-ақ  Люксембург премьер-министрі Ксавье Беттельді қабылдайды. Ал 22 мамырда Нұрсұлтан Назарбаев VIII Астана экономикалық форумының жұмысына қатысады. Форум «Инфрақұрылым: экономиканың орнықты өсімінің драйвері» тақырыбына арналмақ. Іс-шараға 90 елден 3000-ға жуық саяси, сарапшылық және іскерлік топ өкілдерінің қатысуы жоспарланған.

14.05.2015 | Елбасы кітапханасында оқушылардың ғылыми жобалары байқауының жеңімпаздарын марапаттау рәсімі

Ертең, 15 мамыр күні 16:00-де, Қазақстан Республикасының Тұңғыш Президенті - Елбасының кітапханасында оқушылардың ғылыми жобаларға арналған екі байқауының – «Әлемді өзгертетін идеялар» және «Қазақ хандығына – 550 жыл» жеңімпаздарын марапаттау рәсімі өтеді. Бұл байқаулар былтырғы жылдың соңында Астана қаласы мектеп оқушыларының арасында жарияланды. Елбасы кітапханасының бастамасымен өткізілген конкурстарға ҚР Білім және Ғылым министрлігі, Астана қаласының Білім басқармасы, «Астана Дарыны» аймақтық ғылыми-тәжірибелік орталығы қолдау білдірді.

14.05.2015 | «ҚАЗАҚ ХАЛҚЫНЫҢ САЛТ-ДӘСТҮРЛЕРІ» КІТАБЫНЫҢ ТАНЫСТЫРЫЛЫМЫ

2015 жылдың 14 мамырында сағат 17.00-де Елбасы кітапханасында суретші Ералы Оспанұлының «Қазақ халқының салт-дәстүрлері» кітабының таныстырылымы өтеді. Кітап қазақ мәдениетінің жаңа көкжиектерін – салт-дәстүріміздің еленбей келген тұстарын ашып көрсетеді. Мәселен, күйеу жігіттің қалыңдық ауылына асау атпен келуінің, сәбиге тілашар тойын жасаудың, келіннің қайындарын есімдерімен емес, ерекше қосалқы есімдермен атауының себептерін түсіндіреді.

12.05.2015 | ТОЛЕРАНТТЫЛЫҚ ТАҒЫЛЫМЫ

2015 жылдың 15 мамырында сағат 10:00-де Қазақстан Республикасының Тұңғыш Президенті – Елбасы кітапханасында «Толеранттылық тағылымы» online семинар-тренингі өткізіледі. Елбасы кітапханасының жаңа жобасы Қазақстан халқы ассамблеясының 20 жылдығына арналады. Шара ҚР Білім және ғылым министрлігінің, Қазақстан халқы ассамблеясының қолдауымен Л.Н.Гумилев атындағы Еуразия ұлттық университетімен, Мемлекеттік басқару академиясымен бірлесе өткізіледі.

04.05.2015 | ЖЕҢІС ЭСТАФЕТАСЫ

2015 жылдың 5-6 мамыр күндері Қазақстан Республикасының Тұңғыш Президенті – Елбасы кітапханасында Ұлы Отан соғысы Жеңісінің 70 жылдығын атап өтуге арналған шаралар өтеді. «Жеңіс эстафетасы» жобасы өскелең ұрпақтың бойындағы рухани-адамгершілік, азаматтық, патриоттық тәрбиені жетілдіре түсу мақсатында ұйымдастырылады. Шараға қатысушыларға 1941-1945 жылдардағы Ұлы Отан соғысы, ондағы жауынгерлер мен олардың ерліктері туралы білім беріледі.

02.05.2015 | «ЖАСЫЛ ҚАЗАҚСТАН» акциясы

Қазақстан Республикасының Тұңғыш Президенті – Елбасының кітапханасы «Жасыл Қазақстан» акциясының басталғанын хабарлайды және жұртшылықты аталған бастаманы қолдауға шақырады. 2015 жылдың 4 мамыры күні сағат 16.00-де Елбасы кітапханасының қызметкерлері, оқырмандары және «Кемел ел» жастар тәрбиесі орталығының мүшелері Назарбаев орталығы ғимаратының аумағына ағаш, тал отырғызуға шығады. Акция «Жасыл Жер» ЖШС қолдауымен өткізіледі. Ұйымдастырушылар бұл ұсынысты еліміз бойынша қолдап, дәстүрге айналдыруға үлес қосушылар табылатынына үмітті.

Беттер